ek nasha sa zehn par chhane laga
aap ka chehra mujhe bhane laga
chandni bistar pe itrane lagi
chand banhon mein nazar aane laga
ruh par madhoshiyan chhane lagin
jism ghazlen wasl ki gane laga
tum karam-farma hue sad-shukriya
KHwab mera mujh ko yaad aane laga
rafta rafta yasmin khilne lagi
mausam-e-gul ishq farmane laga
zulf ki KHushbu shagufta lab ‘kanwal’
manzar-e-pur-kaif dikhlane laga